-مرحبا
-أهلين
-كيفك؟
-مين انا؟
-هو فيه غيرك هون،طبعا انت!
-اه..منيح زي ما بيقولوا!
-مالك،شكلك زعلان!
-لا مش زعلان،بس حاسس بشوية قرف عرضي!
-…
-ها…اسمع اسمع شو بيقول عبدالوهاب: "لولا الحب ما كان ولا إنسان"!
-ها ها ها
-شو شايفك مكيّف مش مصدّق هالحكي؟!
-طبعا مش مصدق! ولاّ ليش اخترعوا الإبر فكرك؟؟ عشان نصدّق، وانا ما مشي عليّ هالاختراع!
-…
-طيب ليش؟
-ليش شو؟
-ليش وبس…
-انت هلأ سألتني أصعب سؤال ممكن تسألو لأي حدا: "ليش وبس"
ليش؟انا بقلّك ليش…أول اشي لما تحس انو: لولا الموت ما كان ولا إنسان،شو بيصير فيك؟
-شو؟
-لما تكون مش فاهم اشي من اللي حواليك،لما تكون مش فاهم اي اشي! أي اشي! مش فاهم ليش انتة بتشرب مي،مش فاهم انك انتة بني آدم ولاّ لأ يا رجل،الاشي الوحيد اللي بيخلّيك تحس انّك بني آدم هالكلمتين اللي بتشوفهم مكتوبين على حيطان المدارس: الإنسان أغلى ما نملك ومن هالحكي! أهلين أغلى ما نملك!! سلملي عليه بس تشوفو! كل ما تفكّر حالك عرفت اشي،ورحت عند الحلاّق تزبّط شعرك،وفكّرت انو هاي القصّة منيحة الك، بيطلعلك 33 فرع لكل شعرة، والمشكلة انو انتة مش عارف ليش! بتروح عالجامعة زي العبيط كل يوم، وبرضو مش فاهم اشي! مش عارف اشي! بتروح بتنزت على هالكرسي، بتتحوّل لآلة لمدة خمسن دقيقة وبعدين بتطلع بتصير إنسان غبي لمدة عشر دقايق وبتطلع عالمحاضرة التانية وبتتحول لآلة عبيطة لمدة 50 قيقة وبتطلع بتصير غبي مرة تانية،وبتروح عالبيت، اذا بدّك ترجع في البيت لإنسان، مشكلة! لأنو بيصير بدّك تاكل، والأكل مش ببلاش! وبييجي عبالك تشربلك كاسة بنزين تتسلى! وأهم اشي تصور يا رجل انو الحيطان بطّلت تحكي!!
-ول! الحيطان بطّلت تحكي!
-اه بطّلت تحكي! وصّلت في الحيطان انها بطّلت تحكي!
-له له له…لا حول ولا قوة إلا باللع،والله مش خبرية!
-يا زلمة اذا شجرة اللوز اللي باب بيتنا بطّلت تحكي كمان!
-وااااال!! ولاّ مين ضل يحكي؟! اذا الحيطان والشجر بطل يحكي مين بيحكي لعاد؟!
-مش بس الحيطان والشجر ،الحيطان والشجر والورد والشوارع والبيوت والسما والتراب وتنكة زيت الزيتون اللي عنّا ومرتبان اللبنة ، يا زلمة اذا كيلو العدس سكت كمان!! ييي،وشو بدي اعدّلك لأعدّلك!
-والله يا زلمة الدنيا متغيرة!! ولاّ مين بيحكي هالأيام!؟؟
ـــــــــــــــــــــــــــــــــــــــــــــــــــــــــ
التصنيفات : غير مصنف |
